Turmush — Чүй облусунун Панфилов районунда 500дөй алдыңкы окуучулар «Манас», «Семетей», «Сейтек» уюмдарына өтүп, жагоо жана төш белги тагынышты. Бул тууралуу райондук «Башат» балдар чыгармачылык билим берүү борборунун усулчусу Мыскал Алымбаева билдирди.
Иш-чара В.Я.Захарченко атындагы Чалдыбар №1 жалпы билим берүүчү орто мектебинде өттү. Ага облустук усулдук билим берүү бөлүмүнүн башчысынын орун басары Венера Эгембердиева, акимдин орун басары Максат Телекматов, райондук билим берүү бөлүмүнүн башчысы Айгүл Султаналиева жана айыл аймактардын жетекчилери катышты.
«Учурда бардык билим берүү мекемелеринде алдыңкы окуучулар жаш өзгөчөлүгүнө карай "Манас", "Семетей", "Сейтек" балдар уюмдарына өтүп жатышат. Тактап айтканда, "Манас" уюмуна 9-11, "Семетей" уюмуна 5-8-класстар жана "Сейтек" уюмуна башталгыч класстар таандык. Кабыл алуу салтанатында балдарга көк түстөгү жагоо жана төш белги тагылды. Алар билим сапаты жогору, жүрүм-туруму үлгү болгон окуучулар. Дагы алдыңкы 1300 окуучуну балдар уюмуна кабыл алуу мерчемделүүдө. Албетте, уюмдун максаты — ар бир мектепте өзүн-өзү башкарууну жөнгө салуу жана алдыңкы окуучулардын санын көбөйтүү», - деди ал.
